ادب پیما (ادبی‘تہذیبی اور ثقافتی سرگرمیاں)

  ادب پیما

   (ادبی‘تہذیبی اور ثقافتی سرگرمیاں)

ڈاکٹر قطب سرشارکی تازہ تنقیدی کتاب 

رباعیات امجد حیدرآبادی کا موضوعی تناظر

                ایم اے نعیم نائب صدر اردو تلگو لٹریری اسو سی ایشن کے بموجب اردوادب کے نامور اد یب وشاعرنقادو محقق ڈاکٹر قطب سرشار کی تازہ اور دسویں تنقیدی کتاب رباعیات امجد حیدرآبادی کا موضوعی تناظر چھپ کر منظر عام پر آچکی ہے۔  اس کتاب میں شہنشاہ رباعیات حضرت امجد حیدرآبادی کی رباعیات کا تجزیہ اور تنقیدی جائزہ ایک طویل گفتگو کے اسلوب میں شامل ہے۔حضرت امجد کی رباعیات جو قرآنی آیات کے تناظر میں کہی گئی ہیںڈاکٹر قطب سرشار نے آیات کے حوالوں کے ساتھ رباعیات کے موضوع پر گفتگو کی ہے۔طویل گفتگو پر مبنی یہ کتاب اپنی نوعیت کی منفرد تصنیف ہے۔فہرست اور پیش لفظ کے بغیر اس کتاب کو تنقید کے طالب علم نئے زاوئیہ نگاہ سے پڑھیںگے۔ ڈاکٹر قطب سرشار نے اس سے قبل شاعری تنقیدی تحقیق اور ترجمہ نگاری پر مبنی اردو دنیا کو نو کتابیں دی ہیں۔ امید ہے یہ دسویں کتاب اردو حلقوں میں قدر کی نگاہوں سے دیکھی جائے گی۔  

یومِِ جمہوریہ کے موقع پر ادبی محاذکے دفتر میں ایک شعری نشست 

  ’’سہہ ماہی ادبی محاذ ‘‘کے دفتر میں یوم جمہوریہ کے موقع پر ایک پُرکیف شعری نشت  کا اہتمام کیا گیا۔شعری نشست کا آغاز قاری سید مصطفیٰ علی کے تلاوت و دعائیہ کلمات سے آغاز ہوا۔جس کی صدارت شہر کے کہنہ مشق شاعر  جناب ساجد اثر ؔ  نے کی  اور نظامت کے فرائض جناب رفیق رضا ؔ نے بحسن خوبی انجام دی ۔شریک شعرامیںجناب ڈاکٹر کرامت علی کرامتؔ‘جناب سعید رحمانی (اڈیٹر ادبی محاذ کٹک)جناب ناظم قمرؔ‘جناب ساجد اثرؔ‘جناب رفیق رضاؔ‘ جناب اسحاق انور‘جناب صلاح الدین تسکینؔ‘جناب عظیم الدین عظیمؔ‘جناب برہان ادیبؔ‘جناب شہزادہ ظفر‘جناب ارشد جمیل اور راقم الحروف یونس عاصمؔ نے نشست کو چار چاند لگائے ۔سامعین حضرات میں شیخ قریش ‘سیدفرقان علی ‘سید مصطفیٰ علی ‘محمدظہورنے شرکت کی۔ بعد ازاں جناب سید فرقان علی نے اظہار تشکر اور آئندہ اس طرح کی نشست ہونے کی پُرزور اپیل کی۔

محفل ِمشاعرہ

ایک ہی گھر میں ہیں الگ سب کے کمرے٭گھر کامالک ہے جو سمٹا ہے وہ انگنائی تک

حلقہ تشنگانِ ادب کی 489ویںشعری نشستکا روہنی دہلی میںشاندار انعقاد

نئی دہلی 23جنوری ،اسٹاف رپوٹر:حلقہ تشنگانِ ادب کی 489ویں شعری نشستکا انعقاد گان اسپورٹس کلچرل کلب سیکٹر 8 سی 7روہنی ایسٹ دہلی میں ماہر لسانیات 

ودانشور اور مفکر ومدبر ڈاکٹر جی آر کنول کی صدارت اور حلقہ کے جنرل سکریٹری سیماب سلطانپوری کی نظامت میں کیا گیا۔اس موقع پر صدر حلقہ ڈاکٹر جی آ ر کنول نے کہا کہ ادبی دنیا میں دو یا تین ضیائی ہیں جن میں شہباز ندیم ضیائی ایک تھے ،ان کے جانے کی عمر یہ نہیں تھی ،لیکن کیا کریں موت سے کسے مفر ہے۔دہلی کی ادبی فضا سوگوار ہے یہ اردو زبان وادب اور دہلوی تہذیب کاخسارہ ہے۔چند لمحوں کی خاموشی اختیار کرکے تعزیت کااظہار کیا گیا،اور شہباز ندیم ضیائی کی مغفرت کیلئے دعا کی گئی ۔ بالا جیت پلازہ مارکیٹ کی بیک سائڈ میں منعقدپروگرام کے کنوینر ہندی گیت ودھا میں معروف نوجوان رام لوچن تھے۔قارئین کے لئے پسندیدہ اشعار کانمونہ درج ذیل ہے۔

زباں کی نرم گفتاری کے آگے ۔کنول ؔ غیض وغضب کچھ بھی نہیں ہے۔

                                                (ڈاکٹر جی آر کنول)

جو بات تری شوخ نگاہوں نے کہی ہے۔وہ بات کمالاتِ سخن پھانک گئی ہے

                                                (متیر ہوشیار پوری)

وہ حسیں جن کی طلب میں تھے نگاہوں کے ہجوم۔اب ہیں انکے گِردیادیں اور آہوں کے ہجوم

                                                 (ستیہ پال اشک) 

کس میں جرأت ہے جو جھانکے گاکسی کی آستیں۔وہ تمہاری آستیںہو یاہو میری آستیں

                                              (ڈاکٹر ظفر مرادآبادی)

ایک ہی گھر میں ہیں الگ سب کے کمرے۔گھر کامالک ہے جو سمٹا ہے وہ انگنائی تک

                                                (سیماب سلطانپوری)

نجومی دیکھ میرا ہاتھ بولا۔شکستہ خط میں کچھ لکھا گیا ہے

                                                (ڈاکٹررانا گنوری)

انہیںاب علم کیا ہوگا قلم تختی سیاہی کا۔ہمارے عہد کی نسلیں تو کمپیوٹر چلاتی ہیں

                                               (حبیب سیفی)

زندگی کا معرکہ سر کرلیا تو چل دیئے۔آہنی دیوارمیں در کرلیا تو چل دیئے

                                               (مجاز امروہوی)

صلیب ودار پر تنہاتھا میں وہ صف بہ صف تھے۔خلاف ِحق یہاں جتنے تھے سب اسکی طرف تھے

                                               (ڈاکٹرایم آر قاسمی)

اک آ ہ بھری ہم نے غم دل سے نکل آیا۔محفل میں ہزارو ں تھے اک تو نہ نظر آیا

                                                 (رفیق ایٹوی)

میٹھی نہ ہوپھر کیسے مری طرزِ کلامی۔عاشق ہیں ازل ہی سے ترے اردو زباںہم

                                                (نزاکت امروہوی)

میں تو گرتے پڑتے آہی گیا منزل تلک۔قافلہ جوساتھ تھا اس قافلے کا کیاہوا؟

                                               (آشیش سنہا قاصد)

جب بھی ماضی کی یاد آئی ہے۔اس کی قیمت بہت چکائی ہے

                                               (فخر الدین اشرف)

مجھ کوپرواہ کیوں نہیں رہتی۔لب پر کوئی آہ کیوں نہیں رہتی

                                               (ارملا مہہ جبیں)

اوج پر اس کاہی مقدرہے۔جس کو صحبت تری میسر ہے

                                              (عاصم کرتپوری)

اس کے علاوہ ایس کے گرگ نے اپنی نظم خاموش عدالت جاری ہے،ستیہ پال چاولہ،راجندر نٹ کھٹ،رام لوچن ،آمود کمار،سردارسریندر ساگر،سبھاش بھاشی نے اپنی نظم ترنگا  سنائی۔جتیندر کمار نے بھی اپنے کلام سے محظوظ کیا۔میزبان رام لوچن کے اظہار تشکر اور ضیافت کے اعلان کے ساتھ نشست اختتا م پذیر ہوئی۔

جشنِ ظہیر آفاقؔ

تامل ناڈو میں اردو زبان وادب کی پچاس سالہ قابل تحسین خدمات کے پیش نظر اردو اسکالرز اکیڈمی ‘  چینئی کے زیر اہتمام ۱۷؍جنوری ۲۰۱۷ء کی شام کلچرل سنٹر‘  سیمینار ہال میں اردو کے ممتاز فکشن نگار ‘شاعر وتنقید نگار ڈاکٹر ظہیر آفاقؔ کے اعزاز میںجشنِ آفاق منایا گیا۔ مولانا رشید سحرؔ نقشبندی نے صدارت فرمائی ۔ناگپور کے ڈاکٹر محفوظ الرحمٰن خان نے نظامت کے فرائض انجام دیے۔ اردو اسکالرز اکیڈمی کے سکریٹری محروق صدیقی نے جلسہ کی کاروائی کو رونق بخشی۔ تامل ناڈو کی ادبی تنظیم‘ دانشوران شعروادب کی پیش کش‘موصوف کی تخلیقی کائنات پر ضمیمہ ’’جلوہ دانش‘ ‘ کا اسلم پرویز نے اجراء کیا۔ ڈاکٹر محمد نعیم عابد نے تقریباً آٹھ یونیورسٹیوں کے اسکالروں کا خیر مقدم کرتے ہوئے اردو اسکالروں کی اہمیت پر اپنے بلند آہنگ تاثرات پیش کئے۔ان اسکالروں میں پرویز قیصری‘گاندھی بابو‘محسن زیدی‘ عباس علی خان‘ طاہرہ تبسم‘ منی بیگم‘ پاروتی شبنم‘ مہدی حسن‘ یوسف شہناز کے اسمائے گرامی قابل ذکر ہیں۔ جشنِ آفاق کی پیش رفت پر اردو ادب کے جن معتبر مفکرین نے اپنے گراں قدر تاثرات سے نوازا اوران اسکالروں کو گلہائے عقیدت کے نذرانے پیش کیے۔جلسے کو خطاب کرنے والوں  میں پنجاب ایسو سیشن کے جنرل سکریٹری شری رمیش لامبا جی‘ بہار کے پروفیسر آفاق عالم صدیقی‘ گلبرگہ کے پروفیسر جعفر حسین جعفری‘ کوزی کوڈ کی پروفیسر کلثوم فاطمہ‘قابل ذکر ہیں۔ جلسہ کے آخری دور میں غزل کی شام‘طلعت محمود کے نام سے کروکی میوزک نے ساز اور آواز کا جادو جگایا ۔ نوازش عالم خاں کے ہدیۂ تشکر پر باذوق سامعین سے بھر پور جلسہ اختتام پذیر ہوا ۔ (مرسلہ:۔ عتیق احمد اشفاق  چینئی)