عارضِ پُر نور تھا کیسا رسولؐ اللہ کا
چاند سے بھی تھا حسیں چہرہ رسولؐ اللہ کا
کاش ہوجاتی عنایت مجھ پہ بھی اللہ کی
دیکھ لیتا خواب میں جلوہ رسولؐ اللہ کا
گُنبدِ خضریٰ ہی رہتا ہے مرے پیشِ نظر
ہے تصور میں مرے روضہ رسولؐ اللہ کا
مجلسِ شوریٰ میں تھے جید صحابیؓ آپؐ کے
مرکزِ تنظیم تھا اعلیٰ رسولؐ اللہ کا
جا نہیں سکتے وہاں تک حضرتِ روح الامیں ؑ
جس جگہ تک تھا قدم پہنچا رسولؐ اللہ کا
رحمتوں کی بارشیں ہوتی ہی رہتی ہیں وہاں
ہے جہاں جس دیش میں روضہ رسولؐ اللہ کا
ڈھونڈتی ہی رہ گئی دنیا جمیلؔ فاطمی
پر نہیں دیکھاکبھی سایہ رسول اللہؐ کا
No comments:
Post a Comment