آدھا تیتر آدھا بٹیر

  آدھا تیتر آدھا بٹیر                                                                          

                                     

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔........ضیا رومانی کولاری........۔۔۔۔۔۔۔۔۔۔۔۔۔۔۔۔

ایک رعب دار شکل و صورت کے مالک ،درمیانہ قد ،فربہ اندام ،ادھیڑ عمر شخصیت ،سفید جبہ،گول ٹوپی اور نیلی لنگی میں ملبوس بس اسٹاپ پر کسی بس کا انتظار کر رہے تھے۔دفعتہ انہوں نے اپنی بیاگ میں سے اردو  روزنامہ نکالااور تازہ خبروں کا جائزہ شروع کیا۔ اتنے میں ا دھر سے ایک اور صاحب وارد ہوئے۔جو کہ اپنے لباس سے ایک ماڈرنائزڈ مولوی لگتے تھے۔،ان کی عمر یہی۳۵،۳۰  سال کے درمیان تھی۔بڑی گرم جوشی سے وہاں بیٹھے ہوئے مسافر کو سلام کیا،مصافحہ کے لئے ہاتھ بڑھایا اور اپنا تعارف کرایا۔۔۔’’ابراہیم شریف،۔۔۔دینی و عربی مدرسہ میں معلم ہوں۔۔آپ؟‘‘۔۔                      

بیٹھے ہوئے شخص نے بتایا۔۔’’غوث احمد۔۔میں ایک چرم مرچنٹ ہوں۔اللہ کے فضل سے میرا اچھا خاصہ کاربار ہے۔‘‘

ابراہیم شریف صاحب ان کے قریب بیٹھ گئے، پھر اخبار کی سرخیوں پر نظر دوڑانے لگے۔

اتنے میں ایک سترہ اٹھارہ سالہ نوجوان آدھمکا۔بلاک پیانٹ،سر پر جا کی ٹوپی پیروں میں بھاری بھاری شوپیٹھ پرنیلی بیگ جس میں کچھ کتابیں بھری ہوئی تھیں۔خود لمبا تڑنگااس پر دراززلفیں جو کہ باربار اس کی آنکھوں پر لڑہک جاتی تھیںاور وہ انہیں بار بار اپنے ہاتھ سے سجاتے نہیں تھکتا تھا۔ایک عجیب اسٹائل سے اپنی گردن کو گھماتااور زبان کو ہونٹوں پر پھیرتا  

، نظریں گھماتا اپنے رکھ رکھائو سے تو ہ کوئی کوہ پیمالگتا تھا، دراصل وہ کسی کالج کا اسٹوڈنٹ تھا۔وہ بھی ایک شان بے اعتنائی کے ساتھ ان کے قریب بیٹھ گیا اور ایک انگریزی اخبار نکال کر فلمی اشتہارات کو بغور دیکھنے لگا۔         

  ان دونوں نے اسے دیکھا اور ایک معنی خیز مسکراہٹ کے ساتھ دوبارہ اردو اخبار کی ورق گردانی کرنے لگے۔                                                                     

پھر نوجوان نے اپنا موبائل نکالا اور اس میں کوئی مووی سیٹ کیا اور دیکھنے لگا۔ موسیقی کی دھنوں پر اس کے پیر تھرکنے لگے۔                                                      

غوث احمد صاحب نے خاموشی کو توڑا۔۔’’اس امریکہ نے پہلے افغانستان پھرعراق پر حملہ کیا، اب ایران پر حملہ کی باتیںکررہا ہے، آخر یہ چاہتا کیا ہے؟۔سارے عالم کی غارت گری؟‘‘۔۔۔                       

ابراہیم شریف صاحب نے بتایا۔۔’’بس دادا گری کرنا چاہتا ہے۔۔سوپر پاور جو ہے‘‘۔۔پھر ایک ماہر نفسیات کی طرح اپنے خیالات کا اظہار کرنے لگے۔۔’’یہ توفطری عمل ہے، جس کسی میںجب دفاعی قوت حد سے تجاوز کر جاتی ہے اوراسے اللہ کی برتری کا علم نہیں ہوتایا یقین نہیں ہوتاتواس کا ذہن مار کھا جاتا ہے،اس کے خیالات میں ایک عدم توزن رونما ہوجاتا ہے اور وہ بہکی بہکی حرکتیں کرنے لگ جاتا ہے۔اس طرح جس کا دماغ ڈھیلا ہو گیا ہو وہ وحشی درندہ بنجاتا ہے،تب اسے بھلے بُرے کی تمیزنہیں ہوتی اپنی قوت کو کمزوروں پر آزمانے لگتا ہے‘‘۔                       

غوث احمد صاحب نے اپنا خیال ظاہر کیا۔۔’’بس جو بھی ہو،یہ امریکن بڑے بددماغ لوگ ہیں،تھوڑے منحوس بھی، وہ یوں کہ پچھلے ہفتہ جب امریکہ کی کوئی مشیر صاحبہ جب اسٹریلیا پہونچی تو وہاں اس کے ساتھ ہی ایک بھاری طوفان آگیا، کھربوں کا تقصان ہوا، چھی، چھی!‘‘۔۔                    

اس بات پر نوجوان نے مداخلت کی۔۔’’ارے!سارے امریکن ایسے نہیں 

ہوتے،چند احمق اورمغرور سیاست دانوں کے سبب تم سارے ملک کو کیوں بدنام کرتے ہو؟‘‘۔۔

اس  بات پر وہ دونوں ہی چونک پڑے،غوث احمد صاحب نے پوچھا۔۔’’کیاتم امریکن ہو؟‘‘۔۔                

ابراہیم شریف صاحب نے ایک اور سوال داغ دیا۔۔’’کرسچین ہو؟‘‘۔۔

۔۔’’ میں امریکن ہوں اور نہ ہی کرسچین،میں بھی آپ جیسا ہی ایک مسلمان ہوں۔ میں تو محض حقیقت پر روشنی ڈال رہا ہوں‘‘۔۔

وہ دونوں ہی اسے حیرت سے دیکھنے لگے کیونکہ وضع قطع سے وہ کوئی کرسچین لگ رہا تھا۔غوث احمد صاحب نے پوچھا۔۔’’تمہارا نام؟‘‘۔۔       

نوجوان نے اپنا تعارف کرنا مناسب سمجھا۔۔’’میرا نام صلاح الدین ہے،میں کمپیوٹر انجنیر ہوں،میرے والدنور الدین ایک کامیاب سیول انجنیر ہیں‘‘۔۔                           

اس کا تعارف سنکر دونوں پھر چونک پڑے،گویا کہ انہیں بجلی کا شاک لگ گیا ہو۔

ابرہیم شریف صاحب نے برجستہ سوال کیا۔۔’’تم تو پڑھے لکھے ہو،ضرور تم نے تاریخ اسلام بھی پڑھی ہوگی؟‘‘۔۔

وہ ایک عجب سی لا پروائی سے اپنے خاص انداز میں گردن کو جھٹکتے ہوئے کہنے لگا۔۔’’ ان تمام قدیم قصہ کہانیوں کو پڑھنے کے لئے میرے پاس وقت نہیں ہے،ویسے پاسٹ از پاسٹ ،ہسٹری از اے رکارڈ آف پاسٹ ایررس،ان سب باتوں میں رکھا کیا ہے؟ مجھے تو ہارڈ ویر اور سافٹ ویرس کی کتابوں سے فرصت کہاں ہے؟‘‘۔۔                                                              

ابراہیم شریف صاحب سے رہا نہ گیاوہ ناک بھوں چڑا کر کہنے لگے۔۔’’تم کیسے صلاح 

الدین ہو جو اپنے نام کی اصلیت اور اسلام کی حقیقت سے ناواقف ہو؟‘‘۔۔

درمیان میں غوث احمد صاحب نے وضاحت کی۔۔’’کیونکہ انہوں نے تاریخ اسلام پڑھی ہی نہیں‘‘

۔ آپ ہی سمجھانے لگے۔۔’’بیٹا! ہم ان سابقہ غلطیوں کو اس لئے جانتے ہیں کہ دوبارہ ہم ایسی غلطیوں سے بچے رہیں‘‘۔                                                            

ابراہیم شریف صاحب نے نوجوان سے پھر پوچھا۔۔’’کیا تم میں کبھی کم از کم اپنے نام کی اصلیت جانے کی خواہش بھی نہیں جاگی؟واہ رے مسلمان !‘‘۔۔                       

غوث احمد صاحب نے ٹہوکہ دیا۔۔’’اگر اس بیچارے نے اردو سیکھی ہوتی تو اسے یہ پتہ چلتا ،اس نے تو بس اپنے کیریر کی خاطر انگریزی پڑھ لی،پھر سافٹ ویر،ہارڈ ویراور ڈارک ویر میں دھنسا رہا۔۔ہاہاہا۔۔میں سچ کہہ رہا ہوں نا؟‘‘۔۔                                                  

اس بات پر نوجوان کوشرمندگی تو ہوئی،مگر وہ اپنی خفت  چھپانے کی خاطر برس پڑا۔۔’’آج تک  ہماری قوم نے سائنس کی قدر نہ کی تبھی تو یہ پیچھے رہ گئی،اسی لئے تو  مشرقی ممالک آج مغرب والوںکے تلوے چاٹنے پر مجبور ہیں‘‘۔۔                                             

اس بات پر غوث احمد صاحب سے نہ رہا گیا انہوں نے صفائی پیش کی۔۔’’ہر قوم کو اپنی ترقی اور دفاع کے لئے جس قدر سائنسی فروغ کی ضرورت ہے اپنی اصل و حقیقت کو جاننے ،دوسری اقوام کے مقابلہ میں اپنی برتری کی پہچان کے لئے اسی قدر مذہبی اور تاریخی علوم کا حصول بھی ضروری ہے بیٹا!‘‘۔۔                  

ابراہیم شریف صاحب نے دلیل پیش کی۔۔’’ہر قوم کی عمارت کے لئے اس کا مذہبی علم بنیاد ہے توسائنسی علم اس کی دیواریں،بغیر بنیاد کے ہم کسی مضبوط عمارت کا تصور بھی نہیں کر سکتے‘‘۔۔

یہ دلیل سنکر نوجوان کا سر چکرانے لگا۔کیونکہ وہ سائنس کی جستجو میں کافی دور نکل چکا تھا۔مگراس میں اس بے چارے کا کوئی قصور نہ تھا۔یہ تو اس کے سیول انجنیر والد کی صلاح تھی کہ وہ 

ایک خالص کمپیوٹر انجنیر بنے اور خوب کمائے۔ اس نے کچھ سوچ کر ابراہیم شریف صاحب سے

 دریافت کیا۔۔’’ کیا تم بتاسکتے ہو کہ میرے نام کی اصلیت کیا ہے؟‘‘۔۔اور اپنا موبائل بند کردیا۔

ابراہیم شریف صاحب نے ایک معنی خیز مسکراہٹ بکھیرتے ہوئے کہا۔۔’’اب آیا اونٹ پہاڑ کے نیچے‘‘۔۔

۔۔’’کیا مطلب؟‘‘۔۔

ابراہیم شریف صاحب نے ایک لمبی سانس لی اوربتایا۔۔’’کچھ نہیں بس ایسے ہی کہہ دیا۔دیکھو!دراصل صلاح الدین کا مطلب دین کی صلاح دینے والا،یعنی دین کی طرف راغب                                                                          کرنے والا،وہ تو تم ہو نہیں،تمہارا نام تو صلاح سائنس یا جہاں دار ہونا چاہئے تھاتب فِٹ ہوتا‘‘۔۔                                                                           

آسمان کی وصعتوں میں گھورتے ہوئے کہنا شروع کیا۔۔’’بس یہ بھی ایسے ہی کہہ دیا، برا مت مانو، دراصل تاریخ اسلام میں سلطان صلاح الدین ایوبی نامی ایک عظیم شخصیت گزری ہے،بارھویں صدی کی بات ہے ، اس وقت ہر طرف ان کی شجاعت اور بہادری کا بول بالا تھا،دشمنان اسلام ،اسلام کو اس صفحہ ہستی سے مٹا دینا چاہتے تھے،صلاح الدین ایوبی نے ان کا ڈٹ کر مقابلہ کیا،اور اسلام کے پرچم کو بلند رکھا‘‘۔۔                                           

غوث احمد صاحب نے بڑی ندامت کا اظہار کیا۔۔’’ہم ہو رہے ہیںمغرب کی اندھی دوڑ میں شامل مگرہیں اپنے دین ومذہب سے غافل۔افسوس صد افسوس‘‘۔۔                    

ان دونوں کی غور طلب باتیںسنکر نوجوان کو تعجب ہونے لگا،اوراس میں دین اور اسلام کے متعلق جاننے کا تجسس بیدار ہوا۔ اسے ان باتوں پر یقین ہی نہیں آرہاتھاکہ مسلمانوں نے ایک زمانے میں اس عالم میں اس قدرشجاعت و بہادری کا بھی مظاہرہ کیا ہے۔وہ پوچھنے لگا۔۔’’ارے! 

گیارھویں صدی میں تو ابھی سائنسی ایجادات بھی نہیں ہوئی تھیں۔ یہ جدید سائنسی مشنری اوردفائی

سان تو پندرویں ،سولھویں صدی میں ایجاد ہوئے تھے،تو پھران میں اس وقت وہ کونسی طاقت تھی؟‘‘۔۔        

نوجوان کی دلچسپی کو دیکھ کر وہ جذبات میں بہنے لگے۔۔’’وہ ایمان کی طاقت ،وہ دین کی

حرارت اور وہ ایثار کا جذبہ تھا جس کے سبب چند مٹھی بھر مسلمان سارے عالم پر بھاری تھے‘‘۔۔      

وہ سائنس کا طالب العلم جو کہ اس طاقت و حرارت سے ناواقف تھا،پوچھنے لگا۔۔’’یہ ایمان کی طاقت ،یہ دین کی حرارت کیا ہوتی ہے؟ اور کہاں ملتی ہے؟’’۔۔                  

۔۔’’یہ تو روحانی قوت ہے ،جو کہ دینی علوم کے حصول اور ان کی روشنی میں اپنی زندگی بسر کرنے سے ملتی ہے‘‘۔۔ابراہیم شریف صاحب نے سمجھایا۔                              

نوجوان نے بڑی ہی معصومیت سے پوچھا۔۔’’اور یہ دینی علم کہاں ملتا ہے؟‘‘۔۔

غوث احمد صاحب نے بتایا۔۔’’صحیح اور مکمل دینی علم صرف اور صرف اردو زبان و ادب میں ملتا ہے۔مگر افسوس کہ آج کی یہ نئی نسل اس انمول خزانہ سے محروم ہوتی جارہی ہے‘‘۔۔                 

نوجوان نے دریافت کیا۔۔’’اچھا تو آپ نے کہا کہ سلطان سلاح الدین ایوبی نے دشمنان اسلام کو شکست دی،تو کیا انہوں نے اپنی شکست تسلیم کر لی؟‘‘۔۔

ابراہیم شریف صاحب نے بات کو جاری رکھی۔۔’’نہیں! جب میدان جنگ میں انہیں شکست ہوگئی تو انہوں نے ہمارے ساتھ رہتی دنیا تک ایک تہذیبی جنگ کرنے کی ٹھانی،یعنی ہماری اس مخصوص اسلامی تہذیب و تمدن کو اس صفحہ ہستی سے مٹادینے کی قسم کھائی،کیونکہ انہی تہذیبی و اخلاقی خوبیوں کے سبب اللہ نے ان انمول طاقتوں سے ہمیںنوازا تھا‘‘۔۔                       

درمیان میں غوث احمد صاحب پھر ٹپک پڑے۔۔’’ہماری اسلامی تہذیب کو مٹانے کے

لئے انہوں نے مختلف سازشیں رچائیں،یہ کانونٹ تعلیم کا رواج عام کیاجہاں پر ہمارے بچوں کو اپنی تہذیبی ورثہ سے محروم کیا جا رہا ہے تا کہ نہ رہے بانس اور نہ بجے بانسری‘‘۔۔پھر ایک لمحہ کے توقف کے بعد کہنے لگے۔۔’’ اوریہاں پریہ نا کام کوشش کی جارہی ہے کہ ہماری قوم کا ہر بچہ’ آدھا تیتر آدھا بٹیر ہو کر رہ جائے‘‘۔۔                                                                              

اتنے میں سامنے ،سٹی بس آکھڑی ہوئی،وہاں بس اسٹاپ پر موجود سبھی لوگ اپنے لئے سیٹ حاصل کرنے کی خاطر دوڑ پڑے۔ اس نوجوان نے ان دونوں کا شکریہ ادا کرتے ہوئے ان کو وداع کیا۔ان دونوں نے اپنی چند لمحوں کی ملاقات میںمذہب اسلام کے متعلق جاننے کاوہ ایک نیا جذبہ ایک نیا شوق اس میں پیدا کردیا تھا جسے اس کے ایک تعلیم یافتہ احمق باپ نے ضروری نہ سمجھا تھا۔                                                                               

دفعتہ جیسے ہی اس کی نظر اپنے بازو رکھے ہوئے اس اردو اخبار پر پڑی جس کووہ اجنبی دوران گفتگو بھول گئے تھے۔اس نے بڑے ہی احترام سے وہ اردو اخبار اٹھا لیا۔جب درمیانی صفحہ کھولا ، وہ آج کا مخصوص ’مذہبی صفحہ‘ اردو زبان کی عظمت کا ایک جیتا جاگتاثبوت تھا۔اس میںچھپی ہوئی ’مکہ‘ اور ’مدینہ‘ کی ان دیدہ زیب تصاویر کو تو اس نے پہچان لیا،مگر جب تحریر کو وہ سمجھ نہ سکا تو بے ساختہ اس کی آنکھوں سے دو آنسوٹپک پڑے۔وہ تو کئی انگریزی کورسس کی اسناد کا مالک تھا مگروہ بد نصیب اپنی مادری زبان ’اردو‘ سے ناواقف،اپنی اس نااہلی پر وہ خود کو ایک ناخواندہ انسان سمجھنے لگااور جذبات سے مغلوب ہو کر اس نے ’اردو اخبار‘ کو اپنے سینے سے بھینچ لیا۔                                         

۔۔۔۔۔۔۔۔۔۔۔۔۔۔۔۔۔۔۔۔۔۔۔