Hubab Hashmi Taruf wa Ghazal

حباب ؔہاشمی

ہم نے سمجھا ہے بہر حال زمانے کا مزاج

کیا ملائیگی نظر گردشِ دوراں ہم سے

محولہ بالا شعر سے صاف ظاہر ہے کہ حبا ب ہاشمی صاحب بے رحم حالات کی سفاکیوں کے آگے سپر انداز نہ ہوکرآنکھیں ملاکر بات کرنے کا حوصلہ رکھتے ہیں۔انہوں نے اپنے پچاس سالہ شعری سفرکے دوران بصیرت و بصارت کی جو بلند سطح قائم کی ہے ا س کا اعتراف  متعدد معتبر قلمکاروں نے کیا ہے۔ڈاکٹر جعفر عسکری صاحب فرماتے ہیں۔’حباب ہاشمی کے اشعار میں زمانہِ حال کی دردمندیوں‘کلفتوں‘اور حرماں نصیبیوںکا اظہار تو ہوا ہے لیکن ایک توانا اور صحتمند رجائیت کے ساتھ۔وہ شکست وریخت کی اس خوںآشام  معرکہ آرائی میںپر امید اور ہر محاذپر نبرد آزما اور سینہ سپر نظر آتے ہیں‘

گزشتہ جلد میں ان کی سوانحی تفصیلات پیش کی جاچکی ہیں۔پھر بھی بتا دوں کہ اصل نام سعیدالحسن ہاشمی ہے۔فتحپور(یو۔پی) میں۲؍ اکتوبر۱۹۳۶؁ء کو ولادت ہوئی۔ان کے دو شعری مجموعوں۔۔شکستِ حرف اور نقدِ جاں کو ان کی شاعرانہ ہنرمندیوں کا دو روشن سنگِ میل کہا جاسکتا ہے۔زیرِ نظر غزل  زندگی اور اس سے وابستہ مسائل سے ہمکلام ہے۔اس میں ماضی اور حال کے روشن وتاریک پہلووں کا مشاہدہ بھی کیا جاسکتا ہے۔

رابطہ۔E-38/1جی۔ٹی۔بی نگر۔کریلی۔ الہ آباد۔(U.P)211016

غزل

آرزووں کا جہاں ہے کہ نہیں

زیست اک سیلِ رواں ہے کہ نہیں

مندمل زخمِ جگر ہو کہ نہ ہو  

سعیٔ چارہ گراں ہے کہ نہیں

آپ کی تلخ کلامی توبہ

میرے منھ میں بھی زباں ہے کہ نہیں 

پوچھتے کیا ہو مرا حالِ تباہ 

میرے چہرے سے عیاں ہے کہ نہیں

دولتِ فخر وغنا کیا کہنا

برتر از سود وزیاں ہے کہ نہیں

اپنی تاریخ کا روشن پہلو

اب حدیثِ دیگراں ہے کہ نہیں

اس کو کیا ڈھو نڈتے پھرتے ہو حبابؔ

وہ قریبِ رگِ جاں ہے کہ نہیں

٭٭٭