ارشادؔ مظہری
مغربی بنگال کے ادبی افق پر تازہ تازہ وارد ہونے والے شاعر ارشادؔمظہری کا ظہور ایک ایسے روشن ستارے کی مانند ہوا ہے جس کی روشنی برابر پھیلتی جارہی ہے۔وہ غزل کے شاعر ہیں اور ان کی غزلیہ شاعری ہمیں مختلف زایوں اور محوروں پر سوچنے کے لئے مجبور کرتی ہے۔وہ ہم عصر زندگی کے مسائل کو جزوِ شاعری بناکر اپنے عصری شعور کا جواز بھی فراہم کررہے ہیں۔
اصل نام ارشاد حسین ہے جبکہ قلمی نام ارشاد مظہری۔راجہ بازار کولکاتا میںولادت ۱۲؍دسمبر۱۹۸۶ء کو ہوئی۔میٹرک پاس ہیںاور ذریعۂ معاش تجارت ہے۔چند سال قبل یعنی۲۰۰۶ء میںاپنی شاعری کا آغاز کیا۔آج کے معتبر شاعر جناب نم اعظمی سے شرفِ تلمذ حاصل ہے۔غزلیں ان کے روشن مستقبل کا پتہ دیتی ہیں۔مشق ومزاولت جاری رکھیں تو جلد ہی اپنی پہچان بنالینگے۔ان کی زیرِ نظر غزل قاری کے فکری زاویوں کومتحرک کرتی ہے اور وہ سوچنے لگتا ہے کہ اس کے آس پاس جو پرچھائیاں رقص کرتی ہیں وہ کون ہیں اور ان کی حقیقت کیا ہے؟
رابطہ
۔2/1/25
توپسیا روڈ۔کولکاتا۔
(W.B)700039
غزل
تیرگی میں روشنی سا کون ہے؟
میرے اندر اجنبی سا کون ہے؟
کس کے کھونے سے مرے جاتے ہو تم
زندگی میں زندگی سا کون ہے؟
جھانکتا ہے کون روشن دان سے
گھر کی چھت پر چاندنی سا کون ہے؟
آئیے ویرانیوں میں جا بسیں
آدمی میں آدمی سا کون ہے؟
فکر کے در پر ہے نام ارشادؔ کا
گھر کے اندر فلسفی سا کون ہے؟
٭٭٭
No comments:
Post a Comment