مشاہیرِ ادب کی نظروں میں شمیم انجم وارثی

مشاہیرِ ادب کی نظروں میں

شمیم انجم وارثی

٭جناب شمیمؔ انجم وارثی صاحب کا شعری مجموعہ ’’لفظ لفظ نغمگی‘‘ میرے پیش نظر ہے جس کا مطالعہ کرتے ہوئے مجھے اس بات کا اندازہ ہوا کہ جناب شمیم انجم اور ان کی تخلیقات دونوں اظہر من الشمس ہیں اور اخلاقی طور پر اگرکہا جائے تو جنابِ شمیم انجم کو یہ کہنے میں کوئی باک نہیں کہ وہ اسم با مسمّیٰ ہیں اور جہاں تک ان کی فکری جہات کا سوال ہے وہ ایک ہمہ جہت شاعر نظر آتے ہیں اور ان کے اشعار میں بو قلمونی جگہ جگہ نمایاں ہے ۔ان کے اشعار کو پڑھا جائے تو وہ واقعتا ہونٹوں پر لفظ لفظ نغمگی بکھیر دیتے ہیں اور قاری نغمہ سراہوئے بغیر نہیں رہ سکتا۔

جناب شمیم ؔانجم وارثی کے اشعار ان کی سہل پسندی اور سادہ بیانی کے غماز ہیں۔ان کے اشعار کو پڑھ کر ایسا محسوس ہوتا ہے کہ ان کی وارداتِ قلبی گویا کہ ہر کس و ناکس کے آس پاس روز مرہ پیش آنے والی باتیں ہیں جن کو موصوف نے بڑی سادگی وعمدگی سے قلم بند کئے ہیں۔ مجھے ایسا محسوس ہوتا ہے کہ جناب شمیمؔ انجم وارثی کی شاعری فطری اور آمد کی شاعری ہے۔ جو از خود قارئین کو محظوظ فرمائے گی۔ مجھے قوی امید ہے کہ جناب شمیمؔ انجم وارثی کا شعری مجموعہ’’لفظ لفظ نغمگی‘‘ بالخصوص اردو داں اور اردو طبقہ و قارئین کے دلوں کے تار کو نغمہ ریز کرتے ہوئے ان شاء اللہ مقبول خاص و عام ہوگا۔

                                  خیر اندیش

                                 سراج العارفین سراجؔ (بنارس)

                                  Mob:8687027819

٭شمیمؔ انجم وارثی اپنی غزلوں کے حوالے سے ایک حد تک اپنا اعتبار قائم کر چکے ہیں۔وہ ایک کثیر الکلام اور قادر الکلام شاعر ہیں۔ مختلف شعری اصناف پر مشتمل ان کے کئی مجموعے افقِ ادب پر جلوہ ریز ہوچکے ہیں اور قادر الکلامی کے دعوے کا جواز یہ ہے کہ جس صنف میں طبع آزمائی کی ‘خیال‘جذبہ ڈکشن غرض ہر اعتبار سے اسے خوش بیانی سے متصف کیا۔صنف رباعی جو اردو شاعری کی ایک مشکل صنف ہے اسے اپنی تخلیقی فعالیت کا حصہ بنا کر’’ورق ورق شمیم‘‘کی شکل میں ادب کی ہتھیلی پر رکھ دیا جس میں ان کے فنی جوہر کا مشاہدہ کیا جا سکتا ہے۔

گفتگو غزل کے حوالے سے کی جائے تویہ کہا جاسکتا ہے کہ ادب کی تخلیقی جمالیات کسی بھی موضوع کو شعری اکائی میںاس طرح پیش کرتی ہے کہ آسمانِ 

ذہن پر معنویت کی ایک دھنک کھل اُٹھتی ہے اور قاری اس کے رنگوں کو اپنے اندر اترتا ہوا محسوس کرنے لگتا ہے۔اسی لئے ادب کے گلوبل گاؤں میں اس صنف کی دھوم مچی ہے۔ شمیمؔ انجم جو اپنی آنکھیں اور ذہن کے دریچے کھلے رکھتے ہیں وہ کیسے غزل کی رعنائیوں سے بہرہ مند نہ ہوتے ۔البتہ ان کی غزل کے مزاج میں نرمی کے لوازمات پائے جاتے ہیں۔دراصل وہ پتھریلے الفاظ اورپیچیدہ فکر و خیال کواچھوت مانتے ہیں اور غزلوںکے سُر سے روایت کی دستار گرنے نہیں دیتے‘لیکن کہیں کہیں شعری رویوں کی کج کلاہی بھی درشاتے نظر آتے ہیں۔ 

شمیمؔ انجم نے غزل میں اپنی ایک الگ راہ تو نکالی لیکن سادگی‘ رعنائی اور شعریت کی لازوال وراثت سے استفادہ بھی کیا۔ رومانی شاعری کے مضامین میں یکسانیت کے باوجود رومان کو ہی اپنی غزل کا محور بنایا ہے اور رومانیت کے مثبت اوصاف کو چن چن کر اپنی غزلوں کا دامن بھردیا ہے۔

غزل کی پیکرتراشی میں غنائیت ‘ملاحت‘ملائمت‘ رنگ و نکہت جیسی حسّی کیفیات کی ضرورت پیش آتی ہے تب کہیں قاری کے احساسات کے دریچے کھلتے ہیں۔شمیمؔ انجم کا پورا شعری نظام انھیں عناصر کی بنیاد پرقائم ہے۔میں امید کرتا ہوں کہ’’ لفظ لفظ نغمگی‘‘قاری کے بطون میں نغمے کے پودے ضرور لگائے گا۔ 

ستاروں سے چمک‘پھولوں سے ہم خوشبو چراتے ہیں

              غزل تُو ہی بتا تیرے لئے کیا کیا نہیں کرتے                                                    

                                       (شمیمؔ انجم وارثی)                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                     

                                                    اکبر حسین اکبرؔ

                                           Mob:983183553 0

٭شمیم انجم وارثی مجھے بحیثیت انسان بھی اچھے لگتے ہیںاور بحیثیت شاعر بھی۔ انھوں نے شاعری کے مختلف اصناف میں طبع آزمائی کی ہے۔ ان کی کئی کتابیں منظر عام پر آکر مقبول ہو چکی ہیں۔ جن کو ان کے تخلیقی تجربات کا آئینہ کہا جا سکتا ہے۔ ’’لفظ لفظ نغمگی‘‘ان کا تازہ ترین شعری مجموعہ ہے۔ شمیمؔ انجم کو معلوم ہے کہ انھیں کیا کہنا چاہئے اور کس طرح کہنا چاہئے۔وہ لفظ اور معنی کے معاملات سے اچھی طرح واقف ہیں چنانچہ ان کے یہاںوہ آڑی تیڑھی باتیں نظر سے نہیں گزرتیں جو آج کے بہت سے شعراء کے کلام میں عام طور پر دکھائی دیتی ہیں۔

دیکھنے کی بات یہ ہے کہ وہ بدلتی ہوئی زندگی کے نشیب وفراز سے کس طرح گزرتے ہے اور کلاسیکی قدریں ان کے یہاں جلوہ گری کرتی ہیں یا نہیں۔ان کے یہاں فکر الفاظ میں کس طرح ڈھلتی ہے اور کس حد تک دل و دماغ کو متاثر کرنے کی صلاحیت رکھتی ہے ۔ان کا کلام اس کا گواہ ہے کہ وہ نئے سے نباہ کرتے ہیں‘قدیم کو اپنا سرمایہ سمجھتے ہیں اور فکر کے رموز واثر اور زبا ن کے تخلیقی امکانات کو بجا طور پر استعمال کرنے کا ہنر دکھاتے ہیں۔

میں سمجھتا ہوں کہ ان کی شاعری ایک صحت مند اور بالغ نظر تخلیقی رد عمل ہے اور امید کرتا ہوں کہ وہ اس سلسلے کو بحسن و خوبی جاری رکھیں گے۔

                پروفیسر شہپر رسول(صدر شعبۂ اردو جامعہ ملیہ اسلامیہ‘نئی دہلی)

٭شمیم ؔانجم وارثی ہمارے ان شاعروں میں ہیں جنھیں شاعری میں ڈھلے ڈھلائے خیالات اور رسمیات سے پرہیز ہے۔ ہر چند انھیں غزل اور نعت گوئی سے شغف ہے اور اب تک ان کے کئی مجموعے منظر عام پر آچکے ہیںجن کے حسن خیز پر تو شعری افق پر چمکتے نظر آتے ہیں۔بہت کم ایسے شعرا ہیںجو مشاعرے کے ساتھ ساتھ اپنی شاعری کا ادبی اور تہذیبی جواز رکھتے ہیں۔ شمیمؔ انجم وارثی ان میں سے ایک ہیں۔ نیا لب و لہجہ‘ دھیما پن اور ان کی لفظیات ہماری توجہ اپنی طرف کھینچتی ہیں۔مجموعہ’’خواب

  خواب چنگاری‘‘ان کا انفراد ہے۔ وہ اس لئے کہ انھوں نے رسمیات سے اوپر اُٹھ کر اردو کی ان اصناف میں طبع زمائی کی ہے جن میں ہماری شاعری کی بہت ساری کڑیاں خوابیدہ ہیں۔ ’’خواب خواب چنگاری‘‘ ہمیں رہ رہ کر اس وادی میں لے جاتا ہے جسے ہم بہت پیچھے چھوڑ آئے ہیں اور ہم سے تقاضا کرتا ہے کہ اس چنگاری کو اپنے مطالعے سے فزوں تر کر دیں۔اپنے تخلیقی سفر میں شمیمؔ انجم نے نت نئے صنفی تجربے بھی کئے ہیں جن کا مطالعہ دلچسپی سے خالی نہیں ہوگا۔ 

                                          کلیم حاذق

                                    ڈپٹی مجسٹریٹ(حکومت مغربی بنگال)

                                    Mob:903800464 

٭شمیمؔ انجم وارثی میرے ہم عمر بھی ہیں اور میرے ہم عصر بھی لیکن مجھے یہ کہنے میں ذرا بھی تامل نہیں کہ وہ اپنے ہم عصروں میں ممتاز حیثیت رکھتے ہیں۔ ان کے قلم میں جو روانی اور تیزگامی ہے وہ قابل داد بھی ہے اور قابل رشک بھی۔ مختلف اصنافِ سخن پر اب تک ان کی ۱۴؍ کتابیں منظر عام پر آچکی ہیں۔زیر نظر کتاب’’خواب خواب چنگاری‘‘ان کی پندرہویں کتاب ہے۔

میں کسی شاعر کی کتابوں کی تعداد سے اس کا ادبی قد ناپنے کا قائل نہیں ہوں مگر جب کتابوں کی تعداد بھی زیادہ ہوںاور موضوعات میں تنوع بھی ہو توشاعر کی طرف توجہ دینا ناگریز ہوجاتا ہے۔شمیمؔ انجم وارثی زود گو اور بسیار گو شاعر ہیں مگر یہ دیکھ کر مسرت آمیز حیرت ہوتی ہے کہ ان کی زودگوئی اور بسیار گوئی سے ان کا معیار کلام متاثر نہیں ہوتا۔

’’خواب خواب چنگاری‘‘ ۲۷؍ اصنافِ سخن کا حسین مرقع ہے۔ ان میں سے بیشتر وہ اصناف ہیں جنھیں اگر چہ اردو میں اب تک عوامی مقبولیت کا شرف حاصل نہیں ہوسکا ہے مگر شمیمؔ انجم وارثی نے یہ ثابت کر دیا ہے کہ اگر فکر اچھی ہو تو کوئی  صنفِ سخن بری نہیں ہوتی ہے۔

شمیمؔ انجم وارثی کا دعویٰ ہے کہ ’’غزل نما گیت‘‘ ،’’غزل نما نعتیہ گیت ‘‘ اور’’غزالہ نما‘‘ جیسی اصنافِ سخن ان کی اختراع ہیں۔اب یہ دیکھنا ہے کہ ناقدین اور قارئینِ ادب ان اصناف کو کہاں تک شرف قبولیت عطا کرتے ہیں۔

مجھے امید ہے کہ یہ کتاب اپنی رنگا رنگ تخلیقات کے سبب حلقۂ ادب میں پسند کی نگاہ سے دیکھی جائے گی۔

                    احمد کمال حشمی(اسپیشل ریو نیو آفسر۔۱،حکومت مغربی بنگال)

٭شمیمؔ انجم وارثی کی دانش گاہ فن کے کئی دروازے ہیں اور ہر دروازے پر استقبال کے لئے وہ شعری صنف کھڑی ملے گی جو احساس کو نشاط فراہم کر سکتی ہے ۔انھوں نے نہ صرف غزل کی شاہزادی کا لمس حاصل کیا بلکہ دیگر با وقار اصناف کو گلے سے لگانے کی جرأت بھی کی ۔ ان کا شعری آرٹ ان کی مکمل سپردگی اور فنائیت کا دعویدار بھی ہے اورکچھ نئے تجربات کا پروردگار بھی۔

آپ محسوس کریں گے کہ کوئی بھی صنف ہو ان کے لہجے میں کلاسیکی ادب کے رچاؤ کا احساس پایا جاتا ہے جو ان کی زبان اور تخلیقی رمز کے آسمان کو اجالتا ہے مگر اس طرح نہیں کہ خود ان کی شاعری کی فضا اپنے رنگ سے محروم ہو جائے ۔اب ان کی شاعری زندگی کی رگوں میں دوڑتے لہو کی روانی کا نغمہ بننے کی راہ پر چل پڑی ہے اور یہی ان کی بہتر پہچان ہے ۔میرا خیال ہے کہ ان کے شعری مجموعوں کی لمبی قطار میں ملکی اور غیر ملکی خوشبوؤں کا یہ مجموعہ ’’خواب خواب چنگاری‘‘ ایک خوشگوار اضافہ ثابت ہوگااور آئندہ بھی وہ اپنی تخلیقی اپج کو نئی معنویت سے ہمکنار کرتے رہیں گے۔                                       

اکبر حسین

                                     موبائل۔9831835530

٭٭٭