غزل

ایک تازہ غزل پیشِ خدمت ہے۔۔ ملاحظہ فرمائیں۔۔

*اک رنگِ تغزل ایسا بھی۔۔*

از : *احتشام اطہرؔ نعیمی (دھولیہ)*
➖➖➖➖➖➖➖➖➖➖➖➖

کم آشناؤں کو لگتا ہے کم زیادہء عشق
ہے تنگ تنگ نظر کو درِ کشادہء عشق

ہر اک شگاف کے پیچھے سجی تھی اک دنیا
اگرچہ چاک و شکستہ رہا لبادہء عشق

بس اک نظر نے سبق عشق کا پڑھایا تھا
اور ایک عمر مقدر رہا اعادہء عشق

نگاہِ حسن سے دیکھو تو دلنشیں ہیں ستم
مجھے ہیں پھول کی مانند خارِ جادہء عشق

ہر ایک حرف ہے غمازِ داستانِ جنوں
کئی فسانوں سے بڑھ کر ہے حرفِ سادہء عشق

مری جبین پہ ہے محوِ رقص وحشتِ دل
کہ ضبطِ جام سے باہر ہے جوشِ بادہء عشق

دوانگی سے تعلق ہے عشق کا اطہرؔ
سو اہلِ عقل سے ممکن نہیں ارادہء عشق

➖➖➖➖➖➖➖➖➖➖➖➖
*الف اطہرؔ نعیمی۔۔* 8668766035