انٹرویو ایونٹ 2018
قلمکار : جہانگیر نایاب
******************************
غزل
رہ کے چپ اور نہ ظالم کی حمایت کی جائے
اب یہی راہ بچی ہے کہ بغاوت کی جائے
کہہ رہی ہے مِری مٹھی سے پھسلتی ہوئی ریت
کچھ اگر قرض چکانا ہے تو عجلت کی جائے
کوستے رہنا اندھیروں کو نہیں حل کوئی
روشنی کی چلو پیدا کوئی صورت کی جائے
ہر سزا آپ کی منظور مجھے ہے لیکن
کیاخطامجھ سے ہوئی اسکی وضاحت کی جائے
دل پریشاں ہے تجھے بارِ دگر دیکھنے کو
بام پر آنے کی پھر سے ذرا زحمت کی جائے
چاہیئے شیخ کو ہر چیز فراواں لیکن
ہم کو تلقین کہ تھوڑے پہ قناعت کی جائے
پھر برے وقت میں سب چھوڑ گئے ساتھ مِرا
اور یہ بات نہیں ایسی کہ حیرت کی جائے
سارے رشتے ہی محبت کو ترستے رہ جائیں
خود سے نایاب نہ اتنی بھی محبت کی جائے
No comments:
Post a Comment