کدُورتوں کے درمیاں ، عداوتوں کے درمیاں
تمام دوست اجنبی ھیں ، دوستوں کے درمیاں
زمانہ میری داستاں پہ ، رو رھا ھے آج کیوں ؟؟
یہی تو کل سُنی گئی تھی ، قہقہوں کے درمیاں
ضمیرِ عصر میں کبھی ، نوائے درد میں کبھی
سُخن سَرا تو میں بھی ھُوں ، صداقتوں کے درمیاں
شعورِ عصر ڈُھونڈتا رھا ھے مُجھ کو ، اور میں
مگن ھُوں عہدِ رُفتگاں كى ، عظمتوں کے درمياں
ابھی شکست کیا ، کہ رَزمِ آخری اِک اور ھے
پکارتی ھے زندگی ، ھزیمتوں کے درمیاں
ھزار بُردباریوں کے ساتھ ، جی رھے ھیں ھم
محال تھا یہ کارِ زیست ، وھشتوں کے درمیاں
یہ سوچتے ھیں ، کب تلک ضمیر کو بچائیں گے
اگر یوں ھی جِیا کیے ، ضُرورتوں کے درمیاں
”ڈاکٹر پیرزادہ قاسم“ (سابقہ وائس چانسلر کراچی یونیورسٹی)
No comments:
Post a Comment