غم نہیں کچھ بھی اگر برسوں کا یارانہ گیا

غم نہیں کچھ بھی اگر برسوں کا یارانہ گیا 

کس کو کتنا پیار ہے یہ بھی تو پہچانا گیا

جِن منازل سے فرشتے ڈر کے واپس آگئے

ایسی ایسی منزلوں پر صرف دیوانہ گیا

میں ابھی پہچانا ہی کب تھا ان کی بزمِ ناز میں

مجھ سے پہلے میری رسوائی کا افسانہ گیا

کیا ہوا انجامِ الفت کچھ پتہ چلتا نہیں

’’شمع کی لو تک تو دیکھا تھا کہ پروانہ گیا‘‘

مٹ سکا نہ ذہن سے احساسِ تنہائی کبھی

یوں تو ان کی بزم میں جانے کو روزانہ گیا

اب کہاں وہ بزم حیرتؔ اب کہاں وہ محفلیں

دھیرے دھیرے دوستوں کا ذوقِ رِندانہ گیا 

حیرتؔ فرخ آبادی

KhoslaHouse.GroundFloor

NorthOfficePara.Doranda Ranchi-834002