افلاک کے میدان میں جایے گا کون
مہتاب کا گھر روند کے آیے گا کون
اس دور میں اقبالؔ کہاں ہے کوئی
شاہین کے رتبے کو بڑھایے گا کون
ہر خار سے پھولوں کی ادا روٹھ گئی
صیاد سے گلشن کی فضا روٹھ گئی
ڈوبا ہے پسینے میں سراپا اس کا
سورج ہے پریشان ہوا روٹھ گئی
دیواروں سے لپٹی ہوئی کچھ تصویریں
چاٹی ہوئی دیمکوں کی کچھ تحریریں
احساس کی انگلی سے مری پلکوں نے
خوابوں کو کریدا تو ملیں تعبیریں
جنگل کو بیابانوں کو صحراؤں کو
تپتے ہویے ہر کھیت کی آشاؤں کو
اس سال ملاقات نہیں ہے ممکن
برسات نے خط لکھا ہے دریاؤں کو
آنسو نہ بیاباں میں بہایا جایے
خشکی پہ سمندر کو نہ لایا جایے
کام آیے گا یہ وقتِ ضرورت تیرے
انمول خزانہ نہ لٹایا جایے
صحرا کی فضا دیتی ہے آواز مجھے
گلشن کی ہوا دیتی ہے آواز مجھے
شاید ہے وہ اس وقت پریشانی میں
ساون کی گھٹا دیتی ہے آواز مجھے
بجلی سے گھٹاؤں کی بغاوت کیا ہے
آکاش پہ دھرتی کی سیاست کیا ہے
غصے میں بنا دے نہ کہیں دن کو
رات سورج سے الجھنے کی ضرورت کیا ہے
تاریک فضاؤں میں جگنو کی کتاب
اللہ کی قدرت کے جادو کی کتاب
لیٹے ہویے بستر پہ ہوا کے ہر پھول
پڑھتا ہے بڑے شوق سے خوشبو کی کتاب
پتّا پتّا مستی میں ڈولے گا
جو پیڑ ہے چُپ وہ بھی زباں کھولے گا
خاموش کناروں کے کھڑے ہوں گے کان
جب بادل دریاؤں سے بولے گا
ظلمت میں بھی بیچوں گا نہ دستارِ خودی
وقت آنے پہ ہوجایے گی خود پوری کمی
اے چرخ جلا لوں گا غمِ دل کا چراغ
میں بھیک ستاروں سے نہ مانگوں گا کبھی
سر دھوپ کا قدموں سے کچل ڈالا ہے
کرنوں کے سراپے کو بدل ڈالا ہے
آکاش پہ اک شور ہے اک پاگل نے
سورج کے کلیجے کو مسل ڈالا ہے
کس طور سے کرتی ہے محبت دیکھو
غصے میں جو شدت ہے وہ شدت دیکھو
سورج سے بغاوت پہ اتر آئی ہے
برفیلی ہوا کی تو یہ ہمت دیکھو
جب پھیلتی ہے ذہن پہ احساس کی دھوپ
اس دھوپ سے ملتی ہے گلے آس کی دھوپ
اس وقت نظر اٹھتی ہے بادل کی طرف
جب لب پہ اتر آتی ہے پیاس کی دھوپ
ہاتھوں میں رکھ عزمِ محکم کی ڈھال
ہر منڈلاتے خطرے کو سر سے ٹال
کچھ اور ہیں طوفانی ہوا کے تیور
طاقوں پہ جو روشن ہیں چراغ ان کو سنبھال
کہتی ہے قمرؔ دل سے مرے میری لگن
دامن میں سمیٹوں گی میں درِّ عدن
مجھ کو ہے یقیں دور اندھیرا ہوگا
پھوٹے گے جبینِ غمِ وحشت سے کرن
No comments:
Post a Comment