اشارہ

          اشارہ                                         

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔..............۔۔۔۔۔۔۔۔۔۔۔۔۔۔۔۔۔۔

ضیا رومانی کولاری

کلاس روم میں لکچرار بڑے جوش و خروش کے ساتھ ایک خاس موضوع پر لکچر دے رہی تھی۔ساتھ ہی اپنے شاگردوں کے ردعمل کا بغورجائزہ بھی لے رہی تھی۔حسب معمول تقریباً سب ہی شاگرد بڑے انہماک سے لکچر سنتے ہوئے پوائنٹس نوٹ کر رہے تھے۔مگر اس آخری ڈسک پر بیٹھا ہوا ایک شاگرد خواہ مخواہ پینترے بدل رہا تھا،کیونکہ اسے آج کے موضوع میں کوئی دلچسپی نہ تھی لہذااس کا من اپنے ساتھیوں کے ساتھ اٹھکیلیاں کرنے کی سوچ رہا تھا،وہ کبھی اِدھر تو کبھی اُدھر مُڑ کر اپنے ساتھیوں سے سرگوشیاں کرتا۔ اُس کے ساتھی اسے اشاروں کنایوں میں خاموشی کی تلقین کررہے تھے۔تاہم وہ ان اشاروں کو نظر انداز کرتے ہوئے ان کی توجہ کو لکچرار سے ہٹا کر انہیں اپنی جانب راغب کر نے کی سعی پیہم کئے جا رہا تھا۔                                                                           

ویسے لکچرار نے ایک ہی نظر میں اس کی نفسیاتی حالت کو پہچان لیا تھا۔مگر اس نے مصلحتاً  اس کی ان حرکات کو نظر انداز کرتے ہوئے بڑے ہی صبرواستقلال سے اپنے لکچر کو ختم کیا اور جب نوٹس لکھنے کی ہدایتیںدیتے ہوئے لڑکیوں کی جانب دیکھا تو وہاں ایک لڑکی اُس لڑکے کی ان 

حرکات سے محظوظ ہوتے ہوئے مسکراتی ہوئی نظر آئی تو لکچرار کا ماتھا ٹنگا۔                                   

اتنے میں کلاس روم میں کسی نے دبی آواز میں گنگنایا۔۔’’ آنکھوں ہی آنکھوں میں اشارہ ہو گیا۔۔بیٹھے ، بیٹھے جینے کا سہارہ ہو گیا‘‘۔۔

لکچرار کے صبر کا پیمانہ لبریز ہوگیا۔وہ اس سے مخاطب ہوئی۔۔’’لگتا ہے کہ تم کسی غلط فہمی کا شکار ہو۔ تمہارا ذہن کہیں اور بھٹک رہا ہے‘‘۔۔ پھر اپنے آپ بڑبڑانے لگی۔.

۔’’ خیر No Problum ۔۔میںتمہارا Brain Washکئے دیتی ہوں‘‘۔۔پھر اس سے کہنے لگی۔۔’’اچھا !  فرض کرو کہ والدین تمہارے ہاتھ کچھ پیسے تھماتے ہیں اور یہ فرمائش کرتے ہیں کہ دوکان سے کچھ خرید لائو ۔۔تو بتائو تم کیا کرو گے؟‘‘۔۔

لڑکا چہکنے لگا۔۔’’ میڈم! یہ بھی کوئی پوچھنے کی بات ہوئی۔ It is a very silly question‘‘۔۔ اور احمقوں کی طرح اپنے دانت دکھانے لگا۔ اس کے ساتھ ہی کلاس میں خاموشی چھا گئی۔ اس لڑکے نے سہمے ہوئے انداز میں بتایا۔۔’’ ظاہر ہے کہ میں دوکان جائوں گا اور مطلوبہ شئے خرید لائوں گا‘‘۔۔                                                                            

لکچرار پُر اعتماد لہجہ میں کہنے لگی۔۔’’ نہیں! تم ایسا نہیں کرو گے۔ تم دوکان دار کے ہاتھ پیسے تھما کر خالی ہاتھ لوٹ آئو گے‘‘۔۔۔                                                       

تب لڑکا تعجب سے پوچھنے لگا۔۔’’میڈم! کیا میں آپ کو اتنا بے وقوف لگتا ہوں؟‘‘۔۔

لکچرار نے بڑی متانت سے بتایا۔۔’’یقینا تم ایسا ہی کرو گے۔ اب یہیں دیکھ لو۔ تمہارے ان غریب والدین نے اپنے گاڑھے خون پسینے کی کمائی لگا کر تمہیں یہاں تربیت پانے کے لئے بھیجا ہے اور تم ہو کہ۔۔‘‘

لڑکے نے بات کاٹ کر کہا۔۔’’ Sorry Mamعقل مندکو اشارہ کافی ہوتا ہے۔میں تو شیطان کے بہکاوے میں آگیا تھا۔اب ایسا نہیں ہوگا‘‘۔۔                         

لکچرار کی آنکھیں اپنی کامرانی پرچمکنے لگیں۔۔’’ شاباش!  صبح کا بھولا اگر شام کو گھر واپس آجائے تو اُسے بھولا نہیں کہا جاتا۔Now you are a good boy‘‘۔۔         

                        ۔۔۔۔۔۔۔۔۔۔۔۔۔۔۔۔۔