غزل

*اک رنگِ تغزل ایسا بھی۔۔*

از : *احتشام اطہرؔ نعیمی (دھولیہ)*
➖➖➖➖➖➖➖➖➖➖➖➖

یوں اسیرِ پیش و پس نے چارہء مشکل کیا
بادِلِ ناخواستہ اظہارِ حالِ دل کیا

ہوتے ہوتے ہوگیا قلبِ حزیں ایذا پسند
کرتے کرتے ہم نے خود کو عشق کے قابل کیا

چیرنا سینے کو اور پھر کرنا استفسارِ حال
مجھ کو طرزِ قتل نے گرویدہء قاتل کیا

اول اول حوصلوں نے سعیِ آزادی تو کی
آخر آخر خود کو خاکِ حبس میں شامل کیا

اور ہوں گے جو تمنائی ہیں مہر و ماہ کے
ہم نے شمعِ خستہ جاں کو رونقِ محفل کیا

آسماں نے کردیا مجھ کو تنفس کا غلام
حلقہء زنجیر میرا، فکرِ آب و گل کیا

اُس نگاہِ ناز نے اطہرؔ کیا رندوں کو شیخ
جس نگاہِ ناز نے سلطانوں کو سائل کیا

➖➖➖➖➖➖➖➖➖➖➖➖
*الف اطہرؔ نعیمی۔۔* 8668766035