Ghazal > Abdus Salam Kousar

فسوں کاری سے جو واقف نہیں چشمِ غزالاں کی

حقیقت کیا سمجھ پایے گا وہ بزمِ نگاراں کی

نہ وہ ذوقِ عمل ہے اور نہ وہ غیرت ہے ایماں کی

عجب ہے زندگی اس دور میں مردِ مسلماں کی

مسلّط ہوگئی گردِ سیاست موسمِ گل پر

کہ پہچانی نہیں جاتی ہے اب صورت گلستاں کی

یہ کیسا دور ہے مرجھا گئے کیوں پھول سے چہرے

کہیں پھر کھو گئی شوخی مری چشمِ غزالاں کی

کھڑا ہے آج کا انساں تباہی کے دہانے پر

محبت ہی بدل سکتی ہے اب تصویر انساں کی

خزاں کا غم زدہ ماحول ہی راس آگیا جن کو

کریں گے وہ بھلا کیا آرزو جشنِ بہاراں کی

یزیدی فکر میں الجھے ہویے ہیں ذہن و دل جن کے

وہ کیا سمجھیں گے عظمت سرخیٔ خونِ شہیداں کی

یہ آمد ہے مجاہد کی کہ کوئی زلزلہ آیا

’’قدم رکھتے ہی شق ہونے لگی دیوار زنداں کی‘‘

سفر کی آبلہ پائی سے جو گزرا نہیں کوثرؔ

سمجھ پایے گا وہ کیسے چبھن خارِ مغیلاں کی

عبدالسلام کوثر

Tulsipur.Rajnanadgaon-491441